გამოყენების ინსტრუქცია
მოსკიტო
MOSQUITO
პარასამკურნალო საშუალება

წამლის ფორმა: სპრეი გარეგანი გამოყენებისთვის.
შემადგენლობა: პიტნის ზეთი, ჩაის ხის ზეთი, ლავანდას ზეთი, კედრის ზეთი, გერანის ზეთი, გულყვითელას და გვირილის ყვავილების წყლიანი გამონაცემი.
ფარმაკოლოგიური მოქმედება: პრეპარატი ეფექტურია მწერის ნაკბენზე გამოსაყენებლად. პრეპარატის გამოყენება ეხმარება ნაკბენისგან წარმოქმნილი პრობლემების: ქავილის, შეშუპების, სიწითლის შემცირებასა და გაქრობაში.
გულყვითელას და გვირილის ყვავილების გამონაწვლილი ანტიბაქტერიული მოქმედების გამო დადებით ზემოქმედებას ახდენს კანის ანთებით პროცესებზე, აქვს ქავილის საწინააღმდეგო, ტკივილგამაყუჩებელი და ჭრილობის შემახორცებელი მოქმედება. ხსნის სიწითლესა და შეშუპებას.
პიტნის ეთერზეთი აგრილებს კანს, აქვს სპაზმოლიზური და ტკივილგამაყუჩებელი მოქმედება, რის გამოც ამცირებს მწერის ნაკბენით გამოწვეული კანის ქავილისა და ტკივილის შეგრძნებას.
კედრის ეთერზეთს აქვს ანთების საწინააღმდეგო, ტკივილგამაყუჩებელი, ჭრილობის შემახორცებელი, ანტისეპტიკური მოქმედება, ამიტომ ეფექტურია პოსტალერგიული გამოვლინებების დროს.
ლავანდას ეთერზეთს აქვს ძლიერი ანტიბაქტერიული მოქმედება, ასევე, ხელს უწყობს კანის ზედაპირის გაღიზიანების მოხსნასა და დამშვიდებას.
გერანისა და ჩაის ხის ზეთები წარმოადგენენ რეპელენტებს. მათი შემცველობის გამო, კანზე დატანისას, პრეპარატი მწერებზე ახდენს დამფრთხობ ზემოქმედებას, მათ ასევე აქვს მწერების ნაკბენისგან გამოწვეული ქავილის მოხსნის უნარი.
ჩვენება: გამოიყენება კომპლექსურ თერაპიაში, როგორც დამხმარე საშუალება.
· ხსნის კოღოს ან სხვა მწერის ნაკბენისაგან გამოწვეული ტკივილის შეგრძნებას.
· მწერების ნაკბენებზე წასმის დროს ხელს უწყობს კანის გაღიზიანების, ქავილისა და შეწითლების მოხსნას, ამშვიდებს და აგრილებს კანის ზედაპირს, აუმჯობესებს დაზიანებული უჯრედების განახლების პროცესებს, ამაღლებს მის დამცველობით ფუნქციებს, აძლევს ჯანსაღ გარეგნულ იერს.
· აქვს ზომიერი რეპელენტური (მწერების დამფრთხობი) მოქმედება, რის გამოც სპრეის კანზე დატანისას მცირდება ახალი ნაკბენების წარმოქმნის ალბათობა.
გამოყენების წესი და დოზირება: ხსნარი უნდა შეაფრქვიოთ კანის დაზიანებულ უბანზე (მწერის ნაკბენის მიდამოში). ეფექტის გასაძლიერებლად, შეიძლება ხსნარით დასველებული ბამბის ტამპონის დადება ნაკბენზე რამდენიმე წუთის განმავლობაში.
ხსნარის გამოყენება შეიძლება პროფილაქტიკური მიზნით რეპელენტური ეფექტის მისაღებად.
უკუჩვენება: მომატებული მგრძნობელობა პრეპარატში შემავალი კომპონენტების მიმართ.
გვერდითი ეფექტები: ცალკეულ შემთხვევებში შეიძლება გამოიწვიოს ალერგიული რეაქციები.
ორსულობისა და ლაქტაციის პერიოდი: ორსულობის და ლაქტაციის პერიოდში პრეპარატის გამოყენება ნებადართულია ანამნეზში რომელიმე შემადგენელ კომპონენტზე ალერგიულობის არ არსებობისას.
პედიატრია, გერიატრია: პრეპარატის გამოყენება ნებადართულია ანამნეზში რომელიმე შემადგენელ კომპონენტზე ალერგიულობის არ არსებობისას.
პრეპარატის ზემოქმედება ავტოტრანსპორტისა და მექანიზმის მართვის უნარზე:
პრეპარატი არ მოქმედებს ავტოტრანსპორტისა და მექანიზმების მართვის უნარზე.
ურთიერთქმედება სხვა სამკურნალო საშუალებებთან ან სხვა სახის ურთიერთქმედება: არ არის შესწავლილი.
დოზის გადაჭარბება: დოზის გადაჭარბების შემთხვევები არ დაფიქსირებულა.
გამოშვების ფორმა: 50მლ ხსნარი პოლიმერული მასალის ფლაკონში გამფრქვევით. 1 ფლაკონი მოთავსებულია მუყაოს კოლოფში ინსტრუქციასთან ერთად.
ვარგისობის ვადა: 2 წელი.
ვარგისობის ვადის გასვლის ან ვიზუალური დათვალიერების შედეგად აღმოჩენილი დეფექტების შემთხვევაში პრეპარატის მიღება დაუშვებელია!
შენახვა: ინახება არა უმეტეს 25ºC ტემპერატურის პირობებში, სინათლისგან დაცულ ადგილზე.
გაცემის წესი: გაიცემა რეცეპტის გარეშე.
მწარმოებელი: შპს “ნეოფარმი”.

საქართველო. თბილისი. დ. აღმაშენებლის ხეივანი მე-12 კმ.
ტელ/ფაქსი: +995 (032) 259-64-46, 259-57-90.