გამოყენების ინსტრუქცია
ნეოზოლინი
NEOZOLIN

საერთაშორისო სახელწოდება: ქსილომეტაზოლინი, Xylometazoline;
წამლის ფორმა:
0,1% და 0,05% ნაზალური წვეთები.
0,1% და 0,05% ნაზალური სპრეი.
ფარმაკოლოგიური ჯგუფი:
ალფა-ადრენომიმეტური საშუალება;
შემადგენლობა:
,,ნეოზოლინი”-ს ცხვირის წვეთებისა და სპრეის 1მლ შეიცავს:
ქსილომეტაზოლინის ჰიდროქლორიდს _ 1მგ (0,1% ხსნარი) ან 0,5მგ (0,05% ხსნარი);
დამხმარე ნივთიერებები: ბენზალკონიუმის ქლორიდი ან ნიპაგინი, დინატრიუმის ედეტატი, ნატრიუმის ქლორიდი, ნატრიუმის დიჰიდროფოსფატის დიჰიდრატი, ნატრიუმის ჰიდროფოსფატი უწყლო, გამოხდილი წყალი.
ფარმაკოლოგიური მოქმედება:
ფარმაკოდინამიკა: ქსილომეტაზოლინი მიეკუთვნება ადგილობრივ სისხლძარღვთა შემავიწროებელ საშუალებათა ჯგუფს ალფა-ადრენომიმეტური აქტივობით (არასელექციური ალფა-ადრენომიმეტური). იგი იწვევს ცხვირის ლორწოვანის სისხლძარღვების შევიწროებას, ამცირებს ცხვირისა და ხახის ლორწოვანი გარსის შეშუპებას, ჰიპერემიას, ექსუდაციას.Aაღადგენს ცხვირის გამტარობას და აადვილებს ცხვირით სუნთქვას სურდოს დროს.
თერაპიულ კონცენტრაციებში არ აღიზიანებს ლორწოვანას, არ იწვევს ჰიპერემიას. პრეპარატის მოქმედება იწყება რამოდენიმე წუთში და გრძელდება რამოდენიმე საათის (4-5სთ) განმავლობაში.
პრეპარატის ხანგრძლივმა გამოყენებამ (2 კვირაზე დიდხანს) შესაძლოა გამოიწვიოს სისხლძარღვთა მეორეული გაფართოვება (წამლისმიერი რინიტი), არტერიული წნევის დაქვეითება, რაც გამოწვეულია თავის ტვინის სისხლძარღვთა მამოძრავებელი ცენტრის პრესინაპსური ალფა2-ადრენორეცეპტორების გაღიზიანებით, მედიატორების გამოყოფის დაქვეითებითა და ცნს-დან სიმპითიკური იმპულსების ნაკადის შემცირებით.
ფარმაკოკინეტიკა: ადგილობრივად გამოყენებისას პრაქტიკულად არ შეიწოვება და არ გააჩნია სისტემური მოქმედება.
ჩვენებები:გამოიყენება კომპლექსურ თერაპიაში, როგორც დამხმარე საშუალება.
· მწვავე ინფექციური რინიტი;
· მწვავე ალერგიული რინიტი;
· მწვავე რესპირატორული დაავადება რინიტის სიმპტომებით;
· პოლინოზი;
· სინუსიტი;
· შუა ყურის ანთება (კომპლექსურ თერაპიაში ცხვირ-ხახის ლორწოვანი გარსის შეშუპების შესამცირებლად);
· ავადმყოფის მოსამზადებლად რინოსკოპიის ჩატარებისთვის.
უკუჩვენებები:
· მომატებული მგრძნობელობა მოქმედი ნივთიერების ან შემადგენელი კომპონენტების მიმართ;
· ორსულობა და ლაქტაციის პერიოდი;
· არტერიული ჰიპერტენზია;
· ტაქიკარდია;
· გამოხატული ათეროსკლეროზი;
· ანამნეზში ტვინის გარსებზე ქირურგიული ჩარევა;
· ატროფიული რინიტი;
მიღების წესი და დოზირება: ,,ნეოზოლინი” გამოიყენება ინტრანაზალურად.
0,05% ნაზალური წვეთები გამოიყენება ბავშვებში 2-დან 12 წლამდე:
2-დან 6 წლამდე ასაკის ბავშვებში _ 1-2 წვეთი თითოეულ ნესტოში 1-2-ჯერ დღეში (არაუმეტეს 3-ჯერ დღეში).
6-დან 12 წლამდე ასაკის ბავშვებში _ 1-3 წვეთი თითოეულ ნესტოში 2-3-ჯერ დღეში (არაუმეტეს 3-ჯერ დღეში).
0,1% ნაზალური წვეთები გამოიყენება მოზრდილებში და 12 წელზე მეტი ასაკის ბავშვებში: 2-3 წვეთი თითოეულ ნესტოში 2-3-ჯერ დღეში (არაუმეტეს 3-ჯერ დღეში).
0,05% ნაზალური სპრეი გამოიყენება ბავშვებში 6-დან 12 წლამდე: 1 შესხურება თითოეულ ნესტოში 1-3-ჯერ დღეში.
0,1% ნაზალური სპრეი გამოიყენება მოზრდილებში და 12 წელზე მეტი ასაკის ბავშვებში: 1 შესხურება თითოეულ ნესტოში 2-3-ჯერ დღეში.
პრეპარატი გამოიყენება არაუმეტეს 7 დღისა.
გვერდითი მოვლენები: ,,ნეოზოლინი”-ს ხშირი და/ან ხანგრძლივი გამოყენებისას აღინიშნება შემდეგი გვერდითი მოვლენები: ცხვირ-ხახის ლორწოვანი გარსის გაღიზიანება, სიმშრალე, წვის შეგრძნება, ცემინება, ჰიპერსეკრეცია. იშვიათად – ცხვირის ლორწოვანი გარსის შეშუპება, არტერიული წნევის მომატება, არითმია, თავბრუსხვევა, თავის ტკივილი, გულისრევა, ძილის დარღვევა; დეპრესია (მაღალი დოზებით ხანგრძლივად გამოყენებისას).
განსაკუთრებული მითითებები: ,,ნეოზოლინი” სიფრთხილით ინიშნება შაქრიანი დიაბეტის დროს, ასევე პაციენტებში, რომლებსაც გააჩნიათ მომატებული მგრძნობელობა ადრენერგული საშუალებების მიმართ. 
მისი ხანგრძლივად გამოყენება არ არის რეკომენდებული. ფლაკონი განკუთვნილია ინდივიდუალური გამოყენებისთვის. დაუშვებელია მისი სხვა პირებისთვის გადაცემა ინფექციის შესაძლო გავრცელების თავიდან ასაცილებლად.
ორსულობა და ლაქტაცია:
,,ნეოზოლინი”-ს გამოყენება ორსულობისა და ლაქტაციის პერიოდში არ არის რეკომენდებული. მისი მიღება შესაძლებელია მხოლოდ იმ შემთხვევაში, როცა დედისათვის მოსალოდნელი სარგებელი მკვეთრად აღემატება ნაყოფზე უარყოფითი მოქმედების პოტენციურ რისკს.
ურთიერთქმედება სხვა სამკურნალო საშუალებებთან ან სხვა სახის ურთიერთქმედება: ,,ნეოზოლინი” არ გამოიყენება ტრიციკლურ ანტიდეპრესანტებთან, მაო-ს ინჰიბიტორებთან და სიმპათიკური ნერვული სისტემის აღმგზნებ სხვა პრეპარატებთან ერთად, ვინაიდან შესაძლოა გამოიწვიოს არტერიული წნევის მომატება.
დოზის გადაჭარბება:
სიმპტომები: გვერდითი ეფექტების გაძლიერება.
მკურნალობა: მკურნალობა სიმპტომურია.
გავლენა ავტოტრანსპორტისა და მექანიზმების მართვის უნარზე: ,,ნეოზოლინ”-მა შეიძლება გავლენა იქონიოს ავტოტრანსპორტისა და მექანიზმების მართვის უნარზე. ამიტომ სიფრთხილეა საჭირო იმ პაციენტებისათვის, რომელთა საქმიანობა ყურადღების კონცენტრირებასა და სწრაფ ფსიქომოტორულ რეაქციას მოითხოვს.
შეფუთვა:
10მლ ხსნარი გამჭვირვალე ან თეთრი ფერის პოლიმერული მასალის ფლაკონში საწვეთურით. ფლაკონი მოთავსებულია მუყაოს კოლოფში ინსტრუქციასთან ერთად.
15მლ პოლიმერული მასალის ფლაკონში დოზატორით და დამცავი ხუფით. ფლაკონი მოთავსებულია მუყაოს კოლოფში ინსტრუქციასთან ერთად.
შენახვა: ინახება სინათლისაგან დაცულ და ბავშვებისთვის მიუწვდომელ ადგილზე, 15-25°C ტემპერატურის პირობებში.
ფლაკონის გახსნის შემდეგ პრეპარატი ვარგისია 1 თვის განმავლობაში.
ვარგისობის ვადის გასვლის შედეგად პრეპარატის გამოყენება დაუშვებელია!
გაცემის წესი: ფარმაცევტული პროდუქტის ჯგუფი III, გაიცემა რეცეპტის გარეშე.
ვარგისობის ვადა:
10მლ წვეთები გამჭვირვალე ან თეთრი ფერის პოლიეთილენის ფლაკონში – ვარგისობის ვადაა 3 წელი.
15მლ ხსნარი პოლიმერული მასალის ფლაკონებში დოზატორით – ვარგისობის ვადაა 2 წელი.
მწარმოებელი: შპს “ნეოფარმი”.