გამოყენების ინსტრუქცია

NEOFEN

საბავშვო სუსპენზია

Pediatric suspension

 

წამლის ფორმა: პერორალური სუსპენზია. 

ფარმაკოთერაპიული ჯგუფი: არასტეროიდული ანთების საწინააღმდეგო საშუალება.  

5 მლ სუსპენზია შეიცავს:

აქტიური ნივთიერება:  იბუპროფენი – 100მგ. 

დამხმარე ნივთიერებები: კარბოქსიმეთიცელულოზა, შაქარი, ლიმონმჟავა, გლიცერინი, მეთილპარაბენი, ფორთოხლის არომატიზატორი, გამოხდილი წყალი. 

ფარმაკოლოგიური მოქმედება: იბუპროფენი წარმოადგენს პროპიონის მჟავას ნაწარმს სიცხის დამწევი, ტკივილგამაყუჩებელი და ანთების საწინააღმდეგო მოქმედებით. იბუპროფენის მოქმედების მექანიზმი უპირველესად განპირობებულია პროსტაგლანდინების ბიოსინთეზის დათრგუნვით. ანთების კერაში პროსტაგლანდინების კონცენტრაციის შემცირებას თან ახლავს ბრადიკინინის, ენდოგენური პიროგენების, სხვა ბიოლოგიურად აქტიური ნივთიერებების, ჟანგბადის რადიკალების და NO-ს წარმოქმნის შემცირება. ყოველივე ეს იწვევს ანთებითი პროცესის აქტივობის დაქვეითებას (იბუპროფენის ანთების საწინააღმდეგო ეფექტი), რასაც თან ახლავს ტკივილის აღქმის შემცირება (ანალგეზიური ეფექტი). 

პროსტაგლანდინების კონცენტრაციის და ცერებროსპინალური სითხის შემცირება იწვევს სხეულის ტემპერატურის ნორმალიზაციას (ანტიპირეტული ეფექტი).

იბუპროფენს გააჩნია ორმაგი ანტიპირეტული მოქმედება – ცენტრალური და პერიფერიული. ცენტრალური მოქმედების შედეგად ცნს-ში ხდება ციკლოოქსიგენაზას ბლოკირება, რაც სიცხის დამწევ და ტკივილგამაყუჩებელ ეფექტს იწვევს, ხოლო ანთების კერაში პროსტაგლანდინების კონცენტრაციის შემცირება განაპირობებს ანთების საწინააღმდეგო მოქმედებას (პერიფერიული მოქმედება).   

ფარმაკოკინეტიკა: შეწოვა: პერორალურად მიღებისას იბუპროფენის 80%-ზე მეტი შეიწოვება კუჭ-ნაწლავის ტრაქტიდან, სისხლის პლაზმაში მაქსიმალური კონცენტრაცია მიიღწევა ერთ საათში. საკვების მიღება იბუპროფენის შეწოვას ანელებს, მაგრამ მის ბიოშეღწევადობას არ ამცირებს. 

იბუპროფენი 99%-ით უკავშირდება სისხლის პლაზმის ცილებს, რომელთაგან ძირითად ნაწილს ალბუმინი წამოადგენს. ცილებთან შეკავშირების მაღალი ხარისხი ზღუდავს იბუპროფენის შეღწევადობას სინოვიალურ და ზურგის ტვინის სითხეში. ამიტომაც, იბუპროფენი ნელა აღწევს სინოვიალურ სითხეში და ხანგრძლივად შენარჩუნდება მასში თერაპიული კონცენტრაციით.  

მეტაბოლიზმი: იბუპროფენი ძირითადად ღვიძლში ტრანსფორმირდება.  

გამოყოფა: სამკურნალო საშუალება არ კუმულირდება ორგანიზმში. მიღებული დოზის 70-90% გამოიყოფა შარდთან ერთად მეტაბოლიტების და მათი გლუკორონის მჟავასთან კონიუგატების სახით. 

ჩვენება: გამოიყენება კომპლექსურ თერაპიაში, როგორც დამხმარე საშუალება.

· სიცხის დამწევი საშუალება მწვავე რესპირატორული დაავადებების, გრიპის, პოსტიმუნიზაციური რეაქციების და ბავშვთა ინფექციურ-ანთებითი დაავადებებისას, რომელთაც თან ახლავს სხეულის ტემპერატურის მომატება. 

· ტკივილგამაყუჩებელი საშუალება სხვადასხვა წარმოშობის სუსტი და ზომიერი ინტენსივობის ტკივილის სინდრომის დროს, მათ შორის თავის, კბილის, ყურის, ყელის ტკივილის, შაკიკის, ნევრალგიის, დაჭიმულობის დროს და სხვა. 

მიღების წესი და დოზირება: პრეპარატი მიიღება (კარგად შენჯღრევის შემდეგ) ჭამის შემდეგ დიდ რაოდენობით სითხესთან ერთად.

რეკომენდირებული ერთჯერადი დოზაა 5-10მგ/კგ. სუსპენზიის მაქსიმალური სადღეღამისო დოზა შეადგენს 30მგ/კგ სხეულის მასაზე. 

პრეპარატი ინიშნება ქვემოთ მოყვანილი სქემის მიხედვით:

ჩვილი ბავშვები 6-დან 12 თვემდე (7,7-9კგ): 2,5მლ (ნახევარი ჩაის კოვზი) 3-4-ჯერ დღეში დღე-ღამის განმავლობაში (რაც შეესაბამება 150-200 მგ იბუპროფენს დღე-ღამეში);

ბავშვები 1 წლიდან 3 წლამდე (10-15კგ): 5 მლ (1 ჩაის კოვზი) 3-ჯერ დღეში დღე-ღამის განმავლობაში (რაც შეესაბამება 300მგ იბუპროფენს დღე-ღამეში);

ბავშვები 4 წლიდან 6 წლამდე (16-20კგ): 7,5მლ (ერთ-ნახევარი ჩაის კოვზი) 3-ჯერ დღეში დღე-ღამის განმავლობაში (რაც შეესაბამება 450მგ იბუპროფენს დღე-ღამეში);

ბავშვები 7 წლიდან 9 წლამდე (21-29კგ): 10მლ (2 ჩაის კოვზი) 3-ჯერ დღეში დღე-ღამის განმავლობაში (რაც შეესაბამება 600მგ იბუპროფენს დღე-ღამეში);

ბავშვები 10 წლიდან 12 წლამდე (30-40კგ): 15მლ (3 ჩაის კოვზი) 3-ჯერ დღეში დღე-ღამის განმავლობაში (რაც შეესაბამება 900მგ იბუპროფენს დღე-ღამეში). 

პოსტიმუნიზაციური ცხელება: ჩვეულებრივ, მიიღება 2,5მლ (ნახევარი ჩაის კოვზი), მაგრამ, აუცილებლობისას, განმეორებით მიიღება 6 საათის შემდეგ (არა უმეტეს 5მლ (2 ჩაის კოვზი) დღე-ღამის განმავლობაში). 

პრეპარატის სიცხის დამწევი ეფექტი გრძელდება 6-8 საათი.

განმეორებითი დოზის მიღება შეიძლება არა ნაკლებ 4 საათიანი შუალედის დაცვით.  

გვერდითი მოვლენები: ნეოფენის გამოყენებისას, იშვიათად, შეიძლება გამოვლინდეს შემდეგი გვერდითი ეფექტები: 

· გულისრევა, ღებინება, დისკომფორტის შეგრძნება ან ტკივილი ეპიგასტრიუმში, ფაღარათი, კუჭ-ნაწლავის ტრაქტის ეროზიულ- წყლულოვანი დაზიანებები; 

· ალერგიული რეაქციები: გამონაყარი კანზე, ქავილი, ჭინჭრის ციება, ბრონქიალური ასთმის გამწვავება,  ბრონქოსპაზმი, ანაფილაქსური შოკი, ექსუდაციური ერითემა;

· ტაქიკარდია, ჰიპოტენზია, ანემია, თრომბოციტოპენია, ლეიკოპენია;

· თირკმლების ფუნქციის დარღვევა, ცისტიტი;

ნებისმიერი გვერდითი ეფექტის გამოვლენისას საჭიროა მკურნალობის შეწყვეტა და ექიმთან კონსულტაცია. 

· ინდივიდუალური მომატებული მგრძნობელობა პრეპარატის რომელიმე კომპონენტის მიმართ;

· როდესაც პაციენტი იღებს ასპირინს ან სხა ტკივილგამაყუჩებელ საშუალებას;

· ორსულობის ბოლო ტრიმესტრი;

· კუჭისა და თორმეტგოჯა ნაწლავის წყლულოვანი დაავადება;

· 6 თვემდე ბავშვთა ასაკი. 

· ჰემოფილია, ჰიპოკუაგულაცია, ჰემორაგიული დიათეზი;

· გლუკოზო-6-ფოსფატდეჰიდროგენაზას დეფიციტი.

დოზის გადაჭარბება: დოზის გადაჭარბების სიმპტომებია: ტკივილები მუცლის არეში, გულისრევა, ღებინება, თავის ტკივილი, თავბრუსხვევა, კომა, თირკმელების მწვავე უკმარისობა, წნევის დავარდნა, ტაქიკარდია ან ბრადიკარდია. 

დოზის გადაჭარბებისას საჭიროა დაუყოვნებლივ მიმართოთ ექიმს.

მკურნალობა: კუჭის ამორეცხვა, გააქტივებული ნახშირის, ტუტოვანი სასმელის მიღება, სიმპტომური თერაპია. 

სხვა სამკურნალო საშუალებებთან ურთიერთქმედება:  აცეტილსალიცილის მჟავასთან ან სხვა არასტეროიდულ ანთების საწინააღმდეგო საშუალებებთან ერთად გამოყენებისას იმატებს კუჭ-ნაწლავის მხრიდან გვერდითი მოვლენების განვითარების რისკი.

ნეოფენი ანტიჰიპერტენზიულ და დიურეზულ სამკურნალო საშუალებებთან ერთად გამოყენებისას ამცირებს მათ ეფექტს. 

ანტიკოაგულანტებთან ერთად მიღებისას შეიძლება გააძლიეროს მათი მოქმედება.

ლითიუმთან ან მეტოტრექსატთან ერთად მიღებისას ნეოფენმა შეიძლება გამოიწვიოს პლაზმაში როგორც ლითიუმის, ასევე მეტოტრექსატის კონცენტრაციის მომატება.

ორსულობისა და ლაქტაციის პერიოდი:  ნეოფენის გამოყენება უკუნაჩვენებია ორსულობისა და ლაქტაციის პერიოდში. პრეპარატის გამოყენებისას ბავშვს უნდა შეუწყდეს დედის რძით კვება. 

ზემოქმედება ავტომობილისა და სხვა ტექნიკის მართვაზე: პრეპარატის მიღების დროს საჭიროა სატრანსპორტო საშუალების მართვისა და ისეთი სამუშაოს შესრულებისაგან თავის შეკავება, რომელიც მოითხოვს ყურადღების კონცენტრირებას. 

შეფუთვა: 100მლ სუსპენზია მუქი ნარინჯისფერი მინის ან პოლიმერული მასალის ფლაკონებში. 1 ფლაკონი თავსდება მუყაოს კოლოფში ინსტრუქციასთან ერთად. 

შენახვა: ინახება მშრალ, სინათლისაგან დაცულ და ბავშვებისათვის მიუწვდომელ ადგილზე, არა უმეტეს 25°C ტემპერატურის პირობებში.

ვარგისობის ვადა: 2 წელი.

აფთიაქიდან გაცემის წესი: ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი: შპს ,,ნეოფარმი“ .

 

საქართველო, თბილისი, დავით აღმაშენებლის ხეივანი მე-12 კმ.

ტელ/ფაქსი: +995 (032) 259-64-46;  259-57-90.